માતાજીનો થાળ 🙏🙏

જમોને જમાડું પ્રેમે મોરીમૈયા,

જમજો અંબેમાત જમાડે આજ તમારો બાળ;

જમાડે આજ તમારો બાળ,

જોઈ રહ્યો છું વાટ તમારી, પિરસી મૂકયો થાળ,

જમાડે આજ તમારો બાળ (૨)...

ધારી, ઘેવર, ગુંજ, ગલેફા...

ગુલાબજાંબુ, બરફી, પેંડા;

મગજ, મગદાળ, મૈસુર પીરસ્યો,

પીરસ્યો મોહનથાળ,

જમાડે આજ તમારો બાળ (૨)...

ભાતભાતના શાક બનાવ્યાં...

કચોરીને દહીંવડા બનાવ્યાં;

ચટણી, રાયતા, પાપડ, અથાણાં,

બટેટા પૌવા સાથ,

જમાડે આજ તમારો બાળ (૨)...

મગની મોહક દાળ વઘારી...

દહીં ભાંગીને મે તો લસ્સી બનાવી;

વાલ, વટાણા, ચણા ને ચોળા,

કીધો કમોદ નો પાક,

જમાડે આજ તમારો બાળ (૨)...

ખાટું-ખારું કઈ નવ કહેજો...

જે જોઈએ તે માંગી લેજો;

બાળક ઊભો ચમ્મર ઢોળે, 

હૈયે હરખ ન માય,

જમાડે આજ તમારો બાળ (૨)...

જળ જમનાની ભરી છે જારી...

આચમન કરોને માં આરાસુરવાળી;

લવિંગ, સોપરી, ડાળ, વરિયાળી,

બિડેલ બાસમતી સાથ,

જમાડે આજ તમારો બાળ (૨)...

જમીને જમાડું પ્રેમે મોરી મૈયા, 

જમજો અંબે માત જમાડે આજ તમારો બાળ;

જમાડે આજ તમારો બાળ....