માતાજીની સ્તુતિ

વિશ્વંભરી અખિલ વિશ્વતણી જનેતા, 

વિદ્યાધરી વદનમાં વસજો વિધાતા;

દૂરબુદ્ધિને દૂર કરી સદબુદ્ધિ આપો,

મામપાહી ઓમ ભગવતી ભવ દુઃખ કાપો. 

ભૂલો પડી ભવરણે ભટકું ભવાની,

સુઝે નહિ લગીર કોઈ ડીસા જવાની;

ભાસે ભયંકર વળી મનના ઉતાપો,

મામપાહી ઓમ ભગવતી ભવ દુઃખ કાપો. 

આ રંકને ઊગરવા નથી કોઈ આરો,

જન્માંધ છું જનની હું ગ્રહી બાળ તારો;

ના શું સુણો ભગવતી શિશુના વિલાપો,

મામપાહી ઓમ ભગવતી ભવ દુઃખ કાપો. 

મા કર્મ જન્મ કથની કરતા વિચારું,

આ સૃષ્ટિમાં તુજ વિના નથી કોઈ મારું; 

કોને કહું કઠણ યોગ તણો બળાપો,

મામપાહી ઓમ ભગવતી ભવ દુઃખ કાપો. 

હું કામ ક્રોધ મધ મોહ થકી છકેલો, 

આડંબરે અતિ ઘણો મદથી બકેલો; 

દોષો થકી દૂષિતના કરી માફ પાપો, 

મામપાહી ઓમ ભગવતી ભવ દુઃખ કાપો. 

ના શાસ્ત્રના શ્રવણ નું પયપાન કીધું,

હા મંત્ર કે સ્તુતિ કથા નથી કાંઈ કીધું;

શ્રદ્ધા ધરી નથી કર્યા તવ નામ જાપો, 

મામપાહી ઓમ ભગવતી ભવ દુઃખ કાપો. 

રે રે ભવાની બહુ ભૂલ થઈ છે મારી,

આ જિંદગી થઈ મને અતિશે અકારી;

દોષો પ્રજાળી સઘળા તવ છાપ છાપો,

મામપાહી ઓમ ભગવતી ભવ દુઃખ કાપો. 

ખાલી ન કોઈ સ્થળ છે વિણ આપ ધારો, 

બ્રહ્માંડમાં અણુ અણુ મહિ વાસ તારો;

શક્તિ ન માપ ગણવા અગણિત માપો, 

મામપાહી ઓમ ભગવતી ભવ દુઃખ કાપો. 

પાપે પ્રપંચ કરવા બધી વાતે પૂરો,

ખોટો ખરો ભગવતી પણ હું તમારો;

જાડ્યાધકાર દૂર કરી સદબુદ્ધિ આપો,

મામપાહી ઓમ ભગવતી ભવ દુઃખ કાપો. 

શીખે સુણે રસિક છંદ જે એક રીતે,

તેના થકી ત્રિવિધ તાપ ટળે ખચિતે;

વાઘે વિશેષ અંબા તણા પ્રતાપો,

મામપાહી ઓમ ભગવતી ભવ દુઃખ કાપો. 

શ્રી સદગુરુના ચરણમાં રહીને ભુજું છું,

રાત્રી દિને ભગવતી તુજને ભજું છું;

સદભક્ત સેવક તણા પરીતાપ ચાંપો,

મામપાહી ઓમ ભગવતી ભવ દુઃખ કાપો. 

અંતર વિશે અધિક ઊર્મિ થતા ભવાની,

ગાઉ સ્તુતિ તવ બળે નમીને મ્રૃગાની;

સંસારના સકળ રોગ સમૂળ‌ કાપો,

મામપાહી ઓમ ભગવતી ભવ દુઃખ કાપો.